Reprezentativac BiH i fudbaler Akrona, Ifet Đakovac govorio je za portal MeridianSportBH o početku karijere, klubovima za koje je nastupao, ponudi Partizana, kao i Zmajevima
Ljubav prema fudbalu za Ifeta Đakovca je počela u školskom dvorištu.
“Moja fudbalska karijera je počela tako što sam igrao fudbal u školskom dvorištu sa društvom kao dijete, tada me fudbalska legenda Sjenice Šućro Hodžić vidio kako igram i pozvao me na trening. Tada sam zavolio fudbal i počeo sam trenirati” – rekao je Ifet Đakovac.
Škola FK Partizan je stvorila mnogo igrača, a jedan od njih je i Đakovac.
“Omladinska i kadetska škola Partizana mi je sigurno puno značila u fudbalskom razvoju. Svi znamo da je škola Partizana jedna od boljih u Evropi i tu sam naučio sve neke taktičke fudbalske dijelove. Poslije Partizana sam prešao u Zlatibor i nije mi žao zbog toga iako je Zlatibor tada igrao četvrtu ligu jer su svakom igraču najvažnije utakmice i to se ispostavilo kao dobar potez” – izjavio je Đakovac za naš portal.
Tutin je bio prekretnica u karijeri reprezentativca BiH.
“Prekretnica u mojoj fudbalskoj karijeri je Tutin, jeste da je to bila 3. liga ali tu sam se izdvajao i u posljednjoj polusezoni sam u 16 utakmica imao 10 golova i osam asistencija. Imao sam ponude iz druge lige i odlučio sam se vratiti u Zlatibor s kojim sam ušao u Super ligu Srbije. Potom sam otišao u TSC i rekao bih da je zaista Tutin bio prekretnica u mojoj fudbalskoj karijeri. O Tutinu mogu da kažem sve najbolje i stvarno želim sve najbolje klubu i svim ljudima koji se nalaze tamo” – jasan je on.
Ambicije Zlatibora su privukle Đakovca da opet obuče njihov dres i postane dio istorije.
“Kada je u pitanju taj povratak u Zlatibor oni su bili u vrhu tabele i borili su se za plasman u Super ligu Srbije. To me privuklo, a i pored toga znao sam sve ljude tamo. Tu sezonu smo završili prvi, ušli u Super ligu Srbije i ispisao sam neku istoriju sa Zlatiborom i to mi zaista znači” – naglasio je sjajni fudbaler.
Đakovac je posebno ponosan na period u TSC-u koji mu je kako na poslovnom, tako i na privatnom planu donio puno trenutaka za pamćenje.
“O TSC-u imam samo riječi hvale, to je klub koji me afirmisao kao igrača i ispunio moje dječačke snove. Igrao sam kvalifikacije za Ligu šampiona, Ligu Evrope i sada sam igrao Ligu konferencija sa njima. Igrao sam protiv velikih klubova kao što je Vest Hem, Olimpijakos, Braga, Gent…Tako da je period koji sam proveo u TSC-u jedan od najljepših perioda u mom životu. Ponosan sam na sve, dao sam gol Olimpijakosu i u tom period sam dobio dijete i taj gol sam posvetio ženi i djetetu” – pričao je sa puno emocija Đakovac i dodao:
“Jedan od najdražih golova u karijeri mi je kao što sam već pomenuo gol protiv Olimpijakoasa i gol u posljednjoj utakmici u Ligi konferencija kada smo ostvarili istorijski uspjeh i prezimili u Evropi, gol je bio za 3:3 i onda sam upisao i asistenciju za 4:3.”
Dugo se pominjao mogući prelazak Đakovca u Partizan, a on nam je otkrio zbog čega nije došlo do dogovora.
“Pominjao se Partizan, bilo je to blizu, ali klubovi se nisu uspjeli dogovoriti i ostao sam u TSC-u“ – rekao je.
Nakon odličnih partija u dresu TSC-a Đakovac je napravio transfer u Rusiju.
“Još nisam počeo igrati, nije počela sezona, ali što se tiče treninga i to baš je dosta jače nego u Srbiji. Jedva čekam da krene prvenstvo i da se isprobam u nekoj jačoj ligi. Akron je mlad klub i sigurno da su ambicije za početak da budemo stabilni u sredini tabele i da se polako priključujemo samom vrhu tabele” – kazao nam je reprezentavac BiH.
Najveći uspjeh u karijeri za igrača Akrona je debitovanja za reprezentaciju BiH.
“Srećan sam zbog debitovanja za reprezentaciju BiH i rekao sam da je to najveći uspjeh u mojoj karijeri. Presretan sam zbog toga što sam dio ove reprezentacije i hvala selektoru Barbarezu i gospodinu Emiru Spahiću” – izjavio je on.
Za sami kraj razgovora sa Đakovcem prokomentarisali smo intervju koji je trener Vojvodine Nenad Lalatović dao za naš portal, tačnije riječi hvale na račun Zmaja.
“Pročitao sam izjavu šefa Nenada Lalatovića i sigurno da mi znači i prija mi što nekada takav igrač, a danas trener me cijeni kao igrača i poštuje” – zaključio je Ifet Đakovac.
