Partizan će u ponedjeljak saznati rivala u plej-ofu Lige konferencija.
Na konferenciji za novinare pred prvenstveni meč protiv TSC-a trener Partizana Gordan Petrić izjavio je da bi volio da Lacio bude rival njegovoj ekipi u plej-ofu Lige konferencija.
“Volio bih Lacio. Grad je lijep, dobre pice, špagete. Nije problem, ko god da bude, svi su kvalitetni. Posljednji put smo igrali sa Laciom kada je Vermezović bio trener i dobro smo prošli, bilo je 2:2 tamo. Da vidimo ove naše momke tamo” – rekao je Petrić.
Među mogućim rivalima je i AEK iz Larnake koji je eliminisao Partizan u kvalifikacijama za Ligu Evrope ljetos, a nakon čega je otpušten dotadašnji trener Ilija Stolica.
“Ne mogu da kažem da bismo eliminisali AEK sada, ali bi bilo drugačije. Ilija Stolica, koji je tada bio trener, nije imao dosta prostora, dosta igrača je otišlo i došlo, ko zna, da se i on našao u Ligi konferencija možda bi Partizan igrao mnogo bolje. Sigurno je da Partizan nije isti kao kada je počeo sa Stolicom i sada” – jasan je bio strateg Partizana.
