Mančester junajted je u prvom kolu Premijer lige savladao Lids na svom terenu sa ubjedljivih 5:1.
Susretu na “Old Trafordu” prethodila je velika tuča na ulicama Mančestera u kojoj se učestvovali navijači Junajteda i Lidsa.
Ništa manje vatre nije bilo ni na terenu, a uz sjajnu atmosferu Mančester junajted je već na startu imao dvije dobre prilike. Prvo je malo nedostajalo da Mejson Grinvud kazni neopreznost odbrane gostiju u desetoj minuti, a potom je veliku šansu propustio Pol Pogba, pošto je izašao sam ispred Ilan Meslijea.
Ipak, nakon dvije propuštene velike prilike, Mančester je nakon pola sata stigao do prednosti. Pogba je dobro vidio Brunu Fernandeša, uposlio ga, ovaj sjajno prihvatio loptu i poslao je u mrežu protivnika.
Nakon manje od četiri minute igre u drugom poluvremenu, Lids je šokirao domaće. Luk Ejling je prihvatio loptu na velikoj udaljenosti i bez mnogo razmišljanja šutirao, a njegov snažni i precizni udarac ostavio je nemoćnog Davida de Heu, za 1:1 na “Old Trafordu“.
Nije prošlo dugo od izjednačenja Lidsa, a Mančester junajted je ponovo došao u prednost. Grinvud je lako pretrčao upravo Ejlinga i na asistenciju Pogbe, postigao svoj prvi gol u novoj sezoni.
Dvije minute kasnije domaći su uvećali prednost. Fred je oduzeo loptu gostima na sredini terena, odigrao do Pogbe koji novom asistencijom Fernandešu otvara prostor, a Portugalac nakon jednog lažnjaka je drugi put poslao loptu iza leđa Meslijea.
Do svog het-trika na ovoj utakmici, Fernandeš je stigao u 59. minuti. Viktor Lindelof je poslao sjajnu loptu prema svom saigraču, a on iz prve šutirao neodbranjivo pod prečku, za tada nedostižnih 4:1.
“Tačku na i” u ovoj utakmici stavio je Fred u 68. minuti, nakon što ga je još jednom sjajno uposlio Pogba, kojem je to bila četvrta asistencija na meču.
Mančester junajted u sljedećem kolu igra protiv Sautemptona, dok Lids dočekuje Everton.
