Fudbaleri Španije pobjedom od 2:1 u Berlinu nad Engleskom po četvrti put su u svojoj istoriji postali šampioni Evrope.
Ono što se donekle i očekivalo u ovom finalu je da će Španija biti ta koja će imati posjed lopte. Odmah su preuzeli incijativu i kontrolisali igru, dosta se igralo na polovini Engleske.
Ipak igrači Gereta Sautgejta dobro su zatvorili Lamina Jamala i Nika Vilijamsa po strani, pa Španija nije imala brze prodore i tako nije stvarala velike šanse. Englezi su prvi put zaprijetili u 15. minutu nakon polukontre, no ubačaj Kajla Vokera prema Hari Kejnu je izblokiran. Za 20 minuta odnos u posjedu je 76%-24% u korist “Furije”.
Kasnije se dosta igralo na sredini terena i Španci prosto nisu dopuštali rivalu da ima ikakvu kontrolu. Možemo reći da su ovako obje selekcije igrale i tokom turnira, Španija je uvijek napadala, a Englezi su se dosta branili.
Prvi šut u okvir gola viđen je u 46. minutu kada je Fil Foden pokušao nakon centaršuta Deklana Rajsa, no to je Unai Simon lako odbranio i na pauzu se otišlo s rezultatom 0:0.
Odmah na startu drugog poluvremena vidjeli smo i gol. Lamin Jamal je prošao po desnoj strani, ušao u šesnaesterac i pronašao Nika Vilijamsa koji je dao gol za vođstvo Španije od 1:0.
Već u sljedećem napadu Vilijams je pronašao Danija Olma koji se fino namjestio, ali je loše šutirao s nekih deset metara pored gola. Kasnije je Jamal pronašao Alvara Moratu čiji je šut prošao golmana Engleske, ali je to jedan od igrača izbacio ispred gola. Odmah zatim je i Vilijams šutirao pored gola s 20 metara.
Veliku šansu za Englesku nije iskoristio Džud Belingem koji se okrenuo u 63. minutu i poslao loptu pored stative. I kao protiv Holandije, tako su opet izmjene spasile Englesku, ovaj put je Belingem dodao do Kola Palmera koji je postigao predivan gol za 1:1 u 73. minutu.
Osam minuta kasnije nakon fenomenalne akcije Jamal je došao ne deset metara ispred gola i Džordan Pikford mu je to odbranio. Ipak u 86. Mikel Ojarzabal se sjajno oslobodio i na asistenciju Marka Kukurele je postigao gol za novo vođstvo Španije od 2:1.
Tačno u 90. minutu Simon je odbranio šut Rajsa, pa je Olmo glavom s gol linije spasio svoju mrežu, te je na kraju Španija slavila s 2:1 i postala prvak Evrope.
