U utakmicama 21. kola engleske Premijer lige Brajton je na gostovanju savladao Everton sa 3:2, Brentford je bio bolji od Aston Vile sa 2:1, dok je Lids savladao Barnli sa 3:1.
Pravu goleadu u utakmici između Evertona i Brajtona pokrenuo je Aleksis Mekalister u trećem minutu koji je sačekao loptu od svog saigrača i iz prve je šutirao sa oko deset metara i savladao je golmana domaćih za 1:0. U 21. minutu Brajton je poveo sa 2:0, kada je Den Burn bio na pravom mjestu poslije centaršuta Enoka Mvepua i glavom je zatresao mrežu Evertona.
Onda je četiri minuta kasnije Everton imao penal, ali Dominik Kalvert-Levin nije uspio postići gol i ostalo je 2:0 za Brajton. Ipak “Karamele” se nisu predavale i u 51. minutu Entoni Gordon je šutirao sa oko 20 metara, lopta je zakačila jednog od gostujući igrača i tako prevarila golmana za 2:1.
Najljepši trenutak utakmice uslijedio je u 71. minutu pošto je Mekalister dobio loptu na 25 metara i predivnim šutem je zakucao u mrežu rivala za vođstvo Brajtona od 3:1. Konačnih 3:2 postavio je Gordon svojim drugim golom poslije asistencije Džondžoe Kenija.
Igrači Brentforda uspjeli su da preokrenu na domaćem terenu sa 2:1 i upišu nova tri boda protiv Aston Vile. Emiliano Buendija je u 16. minutu napravio fenomenalan potez prilikom kog se oslobodio svog čuvara i proigrao je Denija Ingsa, koji je uvjerljivo zatresao mrežu domaćih za 1:0.
Izjednačenje Brentfordu donio je Žoan Visa u 42. minutu pošto je dobio loptu na vrhu šesnaesterca i postigao je predivan gol za 1:1. Gol odluke za pobjedu domaćih igrača postigao je Mads Rasmunsen u 83. minutu kome je prvi šut zaustavio golman Aston Vile, ali nije mogao i drugi šut, što je izazvalo veliko oduševljenje kod navijača na stadionu, jer je njihov tim slavio sa 2:1.
Lids je na domaćem terenu ostvario pobjedu od 3:1 nad Barnlije, a sve je pokrenuo Džek Herison kada je oduzeo loptu protivničkom igraču i prvi šut mu je odbranio golman gostiju, ali nije mogao i drugi, te je Lids poveo sa 1:0. Maksvel Korne je izjednačio na 1:1 poslije spektakularnog gola iz slobodnog udarca u 54. minutu sa oko 25 metara.
Još ljepši gol djelo je Stjuarta Dalasa sa vrha šesnaesterca u 77. minutu za vođsto Lidsa od 2:1, dok je pobjedu osigurao Džejms Danijel u 92. minutu glavom sa oko deset metara.
