U okviru šestog kola ABA lige, Mornar će u gostima igrati protiv Krke, a ovaj meč je na programu u nedjelju od 19h.
Gosti u ovaj duel ulaze nakon poraza od Ulma u Evrokupu, a Mihailo Pavićević, trener Barana, pred utakmicu je izjavio sljedeće:
“Umor je bio evidentan u meču sa Ulmom, posebno u posljednjoj četvrtini. Ta utakmica je za nama, a ako nešto ne naučite iz poraza, onda je to dupli poraz. Nadam se da smo izvukli neke pouke. Krka je standardan učesnik ABA lige, godinama igra u regionalnom takmičenju i ako se vratimo unazad, podsjetićemo se i da je bila specijalista za sječu favorita. Ko god ih je iole podcijenio, to je skupo platio. Svjestan sam da nas čeka izuzetno teška utakmica jer je to iskusna ekipa koja zna da igra i koja će iskoristiti svaku šansu koja joj se ukaže. Ukoliko nametnemo ritam da utakmicu držimo u svojim rukama, onda se možemo nadati dobrom. Međutim, imamo još uvijek tih ‘crnih minuta’ kad izgubimo kontrolu igre i počnemo individualnim akcijama da rješavamo meč. I svaki put kad smo tako odigrali riješili smo, zaista, meč, ali u protivnikovu korist. Nadam se da ćemo spremni, kao tim, ući u utakmicu u Novom Mestu, koja će biti, ponavljam, izuzetno teška, kao i svaka u gostima, jer u ABA ligi nema lakog protivnika”.
