U mečevima koji su se odigrali sinoć u NBA ligi Šarlot Hornetsi pobijedili su Nju Jork Nikse, Milivoki Baksi lagano su izašli na kraj protiv Orlando Medžika, dok su Memfis Grizlisi savladali Klivlend Kavalirse.
Hornetsi su na svom parketu pobijedili Nju Jork Nikse rezultatom 109:88, a domaći su tokom cijelog meča imali prednost na svojoj strani, da bi na kraju meč i završili sa maksimalnih +21.
Najefikasniji u pobjedi Hornetsa u ovom susretu bio je Gordon Hejvord sa 34 poena, tri skoka i tri asistencije, na drugoj strani Kevin Knoks ubacio je 19 poena, uz još pet skokova i dvije asistencije.
Milivoki Baksi u Orlandu pobijedili su Medžike rezultatom 121:99.
Do ovako ubjedljive pobjede “Jeleni” su stigli u posljednjoj četvrtini u koju su ušli sa vođstvom 86:82. Čak 35 poena u odlučujućem kvartalu, uz protivnikovih samo 17 bilo je više nego dovoljno da Baksi sinoć upišu sedmu pobjedu u ovosezonskoj NBA ligi.
Najefikasniji u njihovoj franšizi bio je Janis Adetokunbo sa 22 poena, šest skokova i četiri asistencije, a Nikola Vučević bio je najbolji na drugoj strani sa 28 poena, 13 skokova i pet asistencija.
Memfis Grizlisi savladali su Klivlend Kavalirse rezultatom 101:91.
Susret su Grizlisi u svoju stranu prelomili tek u drugom poluvremenu, pošto su na odmoru imali prednost samo pola koša. Serijom Dilona Bruksa u trećem kvartalu stigli su i do prve dvocifrene prednosti (63:53), koju su do kraja i održali, iako su pet minuta prije kraja Kavalirsi prišli na 89:88. Samo tri koša u posljednje tri minute za Kavalirse, značilo je i poraz na ovom meču.
Dilon Bruks je postigao najviše poena u pobjedi Grizlisa (21), uz sedam skokova i tri asistencije. U ekipi Kavalirsa Endru Dramond imao je dabl-dabl učinak od 19 poena i 14 skokova.
