Danas su na rasporedu bile četiri utakmice osmine finala Karabao kupa, a mjesto u četvrtfinalu su izborili Mančester junajted, Mančester siti, Everton i Njukasl.
“Crveni đavoli” su sa izmijenjenim sastavom rutinski slavili na gostovanju u Brajtonu rezultatom 3:0. Do vođstva, gosti su stigli u 44. minuti kada je Skot Mektominej bio najviši poslije centaršuta Huana Mate iz slobodnog udarca. Napadali su domaći u drugom dijelu igre, ali Junajted je bio taj koji je došao prvi do gola u i nastavku. Doni van de Bek je u 77. minuti proigrao Matu, a Španac bez problema pogodio za 2:0. Konačan rezultat postavio je Pol Pogba tri minute kasnije.
Istim rezultatom (3:0), Mančester siti je savladao Barnli na “Turf Muru”. Slično kao i gradski rival, Siti je do prednosti došao pred kraj prvog poluvremena golom Rahima Sterlinga poslije odlične asistencije Bendžamina Mendija. Isti igrač je već na startu drugog poluvremena povećao na 2:0, a za konačnih 3:0 pogodio je Feran Tores u 65. minutu.
U ostalim rezultatima danas, Everton je sa 4:1 deklasirao Vest Hem, dok je Njukasl poslije boljeg izvođenja penala prošao Njuport.
