Čelsi je u okviru 31. kola Premijer lige Engleske kao gost pobijedio Kristal Palas rezultatom 4:1.
Sve je krenulo odlično po “Plavce” kada su u osmoj minuti postigli gol za vođstvo 1:0. Kai Haverc je iskoristio poigravanje u posljednjoj liniji Kristal Palasa i slabijom lijevom nogom pogodio dalji ugao Guaite.
Samo dvije minute kasnije na semaforu je već pisalo 2:0 za Čelsi. Kristijan Pulišić je oslobodio sebi prostor u šesnaestercu i snažno pogodio mrežu domaćih.
Sve oko pitanja pobjednika se znalo nakon pola sata igre pošto je nakon prekida i centaršuta Mejsona Maunta, Kurt Zuma najviše skočio i postigao treći gol za svoj tim.
Uspio je Kristal Palas u 62. minuti da smanji na 3:1. Prošao je po lijevoj strani Džordan Šlup i centrirao, a Kristijan Benteke najviše skočio i glavom matirao Eduarda Mendija.
Konačnih 4:1 je postavio Kristijan Pulišić u 78. minuti nakon asistencije Hakima Zijeha.
Čelsi u utorak igra revanš četvrtfinala Lige šampiona protiv Porta, dok nakon toga dočekuje Brajton. Kristal Palas u sljedećem kolu gostuje Lesteru.
