Bio je još oktobar mjesec 2022. godine kad je Fabricio Romano javio kako je Kristopher Nkunku odradio tajni ljekarski pregled s Čelsijem.
Očekivalo se tada da će “Bluesi” francuskog napadača dovesti na zimu i dogovoriti se s RB Lajpcigom, ali negdje je sve zapelo.
Nkunku je u međuvremenu propustio Mundijal zbog povrede pa se vratio na terene nakratko u februaru, a onda opet izbivao. No, kraj sezone odradio je moćno sa šest pogodaka u nešto više od mjesec dana, a golom i asistencijom donio je Lajpcigju kup.
I eto ga napokon na Stamford Bridžu. Čelsi je osam mjeseci nakon tog pregleda i dogovora s igračem napokon kompletirao transfer, i to aktiviranjem klauzule od 60 miliona eura koja se mogla iskoristiti ove godine.


