Vest Hem je rezultatom 3:2 slavio na gostovanju kod Kristal Palasa u 21. kolu engleske Premijer lige.
Fudbaleri Vest Hema prethodnu su godinu završili gostujućom pobjedom kod Votforda rezultatom 4:1, a danas su na prvi dan 2021. godine sa 3:2 porazili Kristal Palas na strani i tako ostali aktivni u borbi za Ligu šampiona.
U 22. minuti gosti su poveli kada je Majkl Antonio iskoristio odličnu asistenciju Seida Benrahme i savladao Guaitu, a već tri minute poslije Manuel Lancini postigao je fantastičan pogodak poslije dodavanja Deklana Rajsa.
Na odmor su “Čekićari” otišli sa tri gola prednosti. Luka Milivojević im je uveliko pomogao u tome s obzirom da je neforsirano igrao rukom u sopstvenom šesnaestercu zbog čega je dosuđen penal kojeg je u svoj drugi gol na utakmici pretvorio Lancini.
Sedam minuta prije isteka regularnog vremena domaći su uspjeli ublažiti svoj poraz. Majkl Olis je tada bio asistent, a mrežu je zatresao Odson Edvard. U prvoj minuti nadoknade Olis je fantastično pogodio iz slobodnog udarca i tako konačan rezultat postavio na 3:2.
Pobjedom je Vest Hem ponovo došao do pete pozicije i sada kada ima 34 boda od četvrtoplasiranog Arsenala ga dijeli samo bod. Kristal Palas je 11. sa 23.
