Dža Morant, najbolji košarkaš Memfis Grizlisa, propustiće četvrtu utakmicu polufinala Zapadne konferencije NBA lige u kojoj njegova ekipa gostuje kod Golden Stejt Voriorsa, u noći s ponedjeljka na utorak.
Razlog je povreda koljena koju je Morant pretrpio na trećoj utakmici, nakon duela s Džordanom Pulom, koji se nakon utakmice pokušao opravdati:
“Naravno da nisam želio napraviti ništa loše Morantu. Nikada u karijeri nisam i neću ići namjerno nekoga povrijediti. Nadam se da će normalno odigrati četvrtu utakmicu”.
Voriorsi trenutno u seriji na četiri pobjede vode sa 2:1 i Memfis će bez svog vođe na parketu morati pokušati doći do izjednačenja koje bi ih ostavilo u igri za konferencijsko finale.
U jedinoj pobjedi koju je ostvario Memfis briljirao je upravo Morant koji je tada ubacio 47 poena uz šut iz igre 15/31. Imao je uz to i po osam skokova i asistencija te tri ukradene lopte. Trebao bi biti spreman za petu utakmicu u Memfisu.
