Trener Liverpula Jirgen Klop nakon gostujuće pobjede protiv Šefilda 2:0 izjavio je da je vrijeme da klub pokaže gdje mu je mjesto i da se plasira u top četiri u engleskoj Premijer ligi, prenijeli su britanski mediji.
Liverpul je ovog vikenda prekinuo niz od četiri poraza u ligi golom Kurtisa Džounsa i autogolom Kina Brajana i tako došao do veoma važna tri boda u borbi za top četiri pozicije engleske Premijer lige. Uzevši u obzir da četiri od pet ekipa, koje se nalaze na boljoj poziciji od Liverpula, nisu uspjele da upišu pobjede, popularnim “Redsima” su se tako povećale šanse za plasman u Ligu šamipiona.
“Bilo je veoma važno zato što nas je dosta ljudi već otpisalo što je potpuno u redu. Na nama je da pokažemo gdje pripadamo, i mislim da smo u posljednjoj utakmici ličili na tim iz prethodne sezone. U četvrtak igramo protiv Čelsija i pravo vrijeme je da to pokažemo opet. I pored svih problema koje smo imali u prethodnom periodu nastavićemo da se borimo i da dokažemo svoj kvalitet” – izjavio je strateg Liverpula Jirgen Klop.
Susret Liverpula i Čelsija na programu je u četvrtak od 21:15h.
