Fudbaleri Mančester junajteda remizirali su sa Barnlijem na strani 1:1 u 24. kolu Premijer lige Engleske.
“Crveni đavoli” nisu uspjeli da upišu treću uzastopnu pobjedu, pa su pali na petu poziciju sa 39 bodova. Preskočio ih je Vest Hem, koji je slavio nad Votfordom minimalnim rezultatom 1:0.
Barnli je trećim remijem zaredom došao do 14 poena, ali ostaje posljednji na tabeli.
Bolje je Junajted otvorio meč na “Turf muru”. Već u 13. minutu je zatresao mrežu Rafael Varan, međutim, gol nije priznat zbog ofsajda u kojem se našao Hari Megvajer. Samo pet minuta kasnije sve je bilo čisto. Luk Šo je proigrao Pola Pogbu, a Francuz preciznim udarcem obilježio povratak na teren poslije dva mjeseca.
Do odlaska na odmor su gosti mogli da uvećaju prednost, ali su šanse propuštali Edinson Kavani, Bruno Fernandeš i Markus Rašford. Barnli je prvi dio igre završio bez šuta, pa je do izjednačenja stigao iz prvog udarca.
Igrao se 48. minut kad je Vut Veghorst sjajno proigrao Džeja Rodrigeza, ovaj pobjegao odbrani Junajteda i savladao Davida de Heu.
Ispostavilo se da je tada postavljen i konačan rezultat. Đavoli do kraja nisu šutnuli u okvir gola Nika Poupa, iako je u nastavku šansu sa klupe dobio i Kristijano Ronaldo. Najbolju šansu za promjenu ishoda imao je Veghorst. Odlično je gađao sa distance, međutim, De Hea je bio dobro postavljen.
Narednu utakmicu Barnli će igrati protiv Liverpula, dok će Junajted ugostiti Sautempton.
